Түркиядағы жағдайға байланысты, Астана, Алматы, Ақтау, Қарағанды және Орал қалаларынан, барлығы 13 рейс кейінге шегерілді. Бүгін Түркиядан елге орала алмай қалған жолаушылар саны – шамамен 2300 адам.
Бұл туралы шұғыл брифинг өткізген ҚР Инвестициялар және даму вице-министрі Берік Қамалиев мәлім етті деп хабарлайды ҚазАқпарат.
– Түркиядағы жағдайға байланысты, біз Астана, Алматы, Ақтау, Қарағанды және Орал қалаларының әуежайынан 13 рейсті кейінге шегердік. Ұша алмай қалған жолаушылардың саны шамамен 2300 адам. Эйр Астана және Скат әуе компанияларының тоғыз рейсі мен төрт түркиялық әуе тасымалдаушының рейстері кешіктірілді,- деді Берік Қамалиев.
«Қазір Сыртқы істер министрлігімен ақылдаса отырып, алдын ала сағат кешкі 19.00-ге дейінгі рейстерді толық шегердік. Сағат 16.00-де жағдайды қосымша баяндаймыз»,-деді Берік Қамалиев.
Естеріңізге сала кетейік, 16 шілдеге қараған түні Түркияда әскери төңкеріс әрекеті жасалды.