Түркияда Гюленмен байланысы бар делінген 24 теле-радиостанция жабылды
Сейсенбі күні Түркияда ислам дінін уағыздаушы Фетхуллах Гюленмен байланысы бар делінген 24 теле-және радиостанциялардың лицензиялары қайтарылып алынды. Анкара Гюленді 16 шілденің түнінде болған сәтсіз мемлекеттік төңкеріс әрекетіне дем беруші деп айыптайды.
Гюленді қолдаушыларға қарсы компанияда 34 журналист пресс-карттарынан айырылды, білім министрлігінің 15 мың қызметкері, университеттің мың жарымнан астам деканы, діни басқарманың 490 жұмысшысы, премьер-министр аппаратының 257 және барлау қызметінің 100 қызметкері жұмыстарынан шығарылды.
Соңғы күндері 35 мың армия офицері, полиция, сот және мемлекеттік қызмет өкілдерінің біразы ұсталып, қалғандары қызметтерінен шеттетілді. Олардың бәрі мемлекетке қарсы қастандық әрекетіне қатысы бар деп айыпталады.
Сейсенбі күні Түркия билігі АҚШ-та тұратын Гюленді кері қайтарып, қамауға алуды талап етті. Түрік премьер-министрі Бинали Йылдырым АҚШ билігіне электронды жүйемен ол туралы толық мәлімет жібергенін мәлімдеді. Гюлен болса, өзіне тағылған барлық айыптарды жоққа шығарды, тіптен егер АҚШ соты оны кері қайтаруға шешім шығарса, оған да дайын екенін жеткізді. Мұның алдында Вашингтон Анкарадан Гюленнің төңкеріс әрекетіне қатысы бары дәлелденетін жан-жақты әрі нақты дәйектер ұсынуын өтінген.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе