Сыбайлас жемқорлыққа қарсы іс-қимылдар ұлттық бюросының төрағасы Қайрат Қожамжаровтың бұйрығымен сыбайлас жемқорлыққа қарсы күрес жөніндегі өңірлік құрылымдардың басшылары тағайындалды, – деп хабарлады ведомствоның баспасөз қызметі.
Бұйрыққа сәйкес, Қамбатыров Нұрлан Дәулетұлы Сыбайлас жемқорлыққа қарсы іс-қимылдар ұлттық бюросының Атырау облысы бойынша департаментінің басшысы болып тағайындалды. Ол 1970 жылы Жамбыл облысы Талас ауданы Үшарал ауылында дүниеге келген. Тараз мемлекеттік университетін бітірді. Соңғы жылдары Қызылорда облысының, одан кейін Оңтүстік Қазақстан облысы қаржы полициясын басқарған.
Үсенов Данияр Бекбергенұлы Сыбайлас жемқорлыққа қарсы іс-қимылдар ұлттық бюросының Маңғыстау облысы бойынша департаментінің басшысы болып тағайындалды. Ол 14 жылдан астам уақыт прокуратура органдарында еңбек еткен. ҚР мемлекеттік қызмет істері және сыбайлас жемқорлыққа қарсы іс-қимыл агенттігінің Қостанай облысы бойынша департаменті басшысы болған.
Сағиев Елдос Әлиханұлы Сыбайлас жемқорлыққа қарсы іс-қимылдар ұлттық бюросының Қостанай облысы бойынша департаментінің басшысы болып тағайындалды. Ол бұған дейін осы қызмет басшысының орынбасары қызметін атқарған.