Шымкенттегі жанар-жағармай вагонының аударылу себебі – вагонның бүйіріндегі раманың сынуынан болып шықты.
Бұл туралы «Қазақстан теміржолы» ұлттық компаниясының баспасөз қызметі хабарлады.
«Вагонның бүйірлік рамасы қолданыстағы кепіл берілген мерзіміне шыдамай, сынып кетуінен цистерна аударылған. Аталған факт бойынша, арнайы комиссия құрылды. Шығынды цистерна иесі өтейтін болады», – делінген хабарламада.
Цистерна қазақстандық «GE LOGISTICS» жауапкершілігі шектеулі серіктестігіне тиесілі.
Айта кетейік, бүгін 12.53-те Шымкенттегі Қорғасын теміржол вокзалында «Бейнеу-Аса» қатынасындағы жүк пойызының жанар-жағармай құйылған 60 тонналық цистернасы аударылып, отқа оранды.
Бұл туралы ҚР ІІМ Төтенше жағдайлар комитетінің ресми өкілі Руслан Иманқұлов хабарлады.
Өрт сөндірушілер жақын маңда тұрған тағы бір жанар-жағармайы бар цистернаға су сеуіп, жарылып кетпеуін қадағалады.