Оңтүстік Қазақстан облысында әйел адам тізгіндеген қымбат көлікті тартып алған бұзақылар ұсталды.
Шымкенттің әл-Фараби полиция бөлімшесінің ізкесушілері Шымкент қаласының тұрғынына шабуылдап, астындағы қымбат көлігін тартып алып кеткен 4 адамнан тұратын қылмыстық топты құрықтады деп хабарлады Тvk телеарнасы.
“2016 жылдың 24-қарашасында күндіз полиция бөлімшесіне Шымкент қаласының Жандасов көшесі бойында бір көлікке шабуыл жасалғандығы туралы хабар келіп түсті. Оқиға орнына шұғыл жеткен полиция қызметкерлері 38-жастағы келіншекті белгісіз біреулер тұтқиылдан бас салып, “Көлігінен түс, әйтпесе өлтіреміз” деп қорқытып, «Тойота Ланд Крузер» автокөлігін тартып алып, іздерін тез суытқанын анықтады. Бұл факт әл-Фараби полиция бөлімшесі қалалық ішкі істер департаментінің тізіліміне Қылмыстық кодекстің 192-бабы, яғни “Қарақшылық” бойынша тіркеуге алынды” деп хабарлады ОҚО ішкі істер департаментінің баспасөз қызметі.
Күдіктілер қамауға алынды. Қазіргі уақытта полшиция бұл жағдайдың мән-жайын тереңірек зерттеп жатыр. Сотқа дейінгі тергеу жұмыстары жүргізіліп жатыр.