Шымкентте атауы бірдей 7 мектеп пен 7 шағынаудан және 95 көше бар. Мұндай жағдай шаһардың аумағы кеңейіп, іргелес жатқан Сайрам, Төлеби, Ордабасы аудандарына қарасты елді мекендер қалаға қосылған кезде пайда болған, деп хабарлайды 24.kz.
«Бұл шұғыл қызмет көрсететін мекеме өкілдерінің мекенжайды тез тауып баруына кедергі», – дейді ономастикалық сала мамандары.
Облыста жалпы 11 263 көше болса, оның 5 мыңнан астамы жеке адамдардың атымен аталады. Оның ішінде әсіресе Абай, Мұхтар Әуезов пен Жамбыл Жабаев, Сәкен Сейфуллин, Ыбырай Алтынсарин және батыр қыздарымыз Әлия мен Мәншүктің есімі берілген көшелер көп.
– Облысымыздағы көшелер мен нысандардың атауларын тыңғылықты зерттеу нәтижесінде біз көптеген мәселелерді анықтадық. Мысалы, облыс көлемінде Абай Құнанбаев есімі берілген көшелер бар нысандарды зерттеп қарасақ, 92 рет қайталанады екен. Бұл белгілі бір қиындықтар туғызады. Жедел-жәрдем қызметі үнемі таба алмай кешігіп жүреді. Осы мақсатта біз барлық аудан-қалалармен бірігіп жұмыс жасап жатырмыз.