Оңтүстік Қазақстан облысында полиция өзінің ұрланғанын ұйымдастырған бозбалаға қатысты деректі әшкереледі.
Бұл туралы ОҚО ішкі істер департаментінің баспасөз қызметі хабарлады.
Биыл 14-тамызда Шымкент қалалық ішкі істер басқармасына қарасты Қаратау полиция бөлімшесіне 46 жастағы әйел Шымкент қаласының Сайрам ауылында 1993 жылы туылған ұлын белгісіз біреулер «ВАЗ» автокөлігіне отырғызып, алып кеткені туралы арызданған.
ОҚО ішкі істер департаментінің Ұйымдасқан қылмысқа қарсы күрес басқармасы және Қаратау полиция бөлімшесінің қызметкерлері бірлесе жүргізген жедел іздестіру іс-шараларының екінші тәулігінде жоғалған азаматты Шымкент қаласындағы жалдамалы пәтерлердің бірінен тапты.
Сұрастыру кезінде анықталғандай, 23-жастағы жәбірленуші өзінің ұрлануы жайлы әрекеттерін достарының көмегімен өзі жоспарлаған. Жас жігіт полицияға бұл қадамға қарыздарын қайтармау үшін барғанын айтқан.
Аталған жайт бойынша, ҚР Қылмыстық кодексінің 419-бабы, яғни «Көрінеу жалған сөз жеткізу» бойынша қылмыстық іс қозғалды. Қазіргі таңда қылмыстың орын алу себептері мен барысы анықталуда. Сотқа дейінгі тергеу амалдары жүргізіліп жатыр.