Шымкент-Самара тас жолында екі көлік соқтығысып, үш адам көз жұмды

56 просмотров

Оңтүстік Қазақстан облысында жол-көлік оқиғасы салдарынан 3 адам қайтыс болды.

Бұл туралы Оңтүстік Қазақстан облысының ішкі істер департаментінің баспасөз қызметі хабарлайды.

Биыл 24 шілде күні Ордабасы аудандық ішкі істер басқармасының кезекші бөліміне Шымкент-Самара тас жолында жол-көлік оқиғасы орын алғаны туралы хабарлама келіп түскен.

Шұғыл түрде оқиға орнына жеткен полицейлердің анықтағаны, кешкі 22 сағат 35 минут шамасында Шымкент – Самара тас жолында Ордабасы ауданы бағытында келе жатқан «Опель-Вектра» автокөлігі бір жолдағы «Газ-53» жүк көлігімен соқтығысып, жол-көлік оқиғасы орын алған.

Салдарынан «Опель-Вектра» автокөлігінің 22-жастағы жүргізушісі және жолаушылары — ордабасылық 1994 жылы туылған жас жігіт пен сайрамдық 1995 жылы туылған қыз бала алған ауыр дене жарақаттарынан оқиға орнында көз жұмды. Аталған автокөліктің тағы бір жолаушысы 1994 жылы туылған Ордабасы ауданының тұрғыны дене жарақаттарымен аудандық ауруханаға жеткізілді.

Аталған жайт бойынша ҚР Қылмыстық кодекстің 345-бабы, яғни «Көлік құралдарын жүргізуші адамдардың жол қозғалысы және көлік құралдарын пайдалану ережелерін бұзу» бойынша қылмыстық іс қозғалды. Сотқа дейінгі тергеу амалдары жүргізіліп жатыр.

 

Загрузка...