Шекарашылар еліміздің екі өңірінде есірткі тасымалының жолын кесті

25 просмотров

Өткен тәулікте шекарашылар қазақ-қырғыз шекарасында «марихуана» алып өтудің жолын кессе, ал еліміздің батысында көлемі 5 гектар болатын қарасора егістігін анықтады.

ҚР Ұлттық қауіпсіздік комитеті шекара қызметінің баспасөз қызметі хабарлады.

Нақтырақ тоқталатын болсақ, «Мерке теміржол» бақылау-өткізу бекетінің шекарашылары «Бішкек-Мәскеу» бағытында кетіп бара жатқан жолаушылар пойызына шекаралық бақылау жасау кезінде қызметтік иттің көмегімен № 1 купеден салмағы 3 келі, иісі «марихуанаға» ұқсайтын затты анықтады.

Осындайда тасымалдаушылардың өнертапқыштығына таңқаласың. Есірткілік зат диаметрі 35 см, қалыңдығы 5 см болатын бал салатын ыдысқа орналастырылыпты. Вагонның жолсерігі ұсталып, құқыққорғау органдары хабарландырылды.

Еліміздің батысындағы Орал шекара отрядына қарасты «Ақсай» заставасының шекарашылары «Көкнәр» жедел-сауықтыру іс-шарасының аясында Жарсуат аулының маңынан аумағы 5 гектар болатын, өздігінен өсіп шыққан қарасора егістігін анықтады.
Аталған дерек бойынша Шыңығырлау аудандық ішкі істер бөлімі хабарландырылды, сараптама жүргізіліп жатыр. Материалдар аудандық прокуратураға берілді.

Загрузка...