Шекара маңынан игеруге жер берілмесін деген мүлде дұрыс емес – Қуаныш Айтаханов
Қазақстан азаматтарына шекара маңы жерлерін игеруге шектеу қоюға мүлдем болмайды. Өйткені шекара иен қалмауы керек.
Бұл туралы бүгін Жер реформасы мәселелері жөніндегі комиссияның кезекті отырысында Сенат депутаты Қуаныш Айтаханов айтты деп хабарлайды ҚазАқпарат.
– Күн тәртібінде былай жазылыпты: «Қазақстан Республикасы шекарасы маңынан берілетін ауыл шаруашылығы жерлерін беруге шектеу туралы». Кімге беруге шектеу туралы? Шетелдіктерге ме, жоқ қазақстандықтарға ма? Мына жерде қазақстандықтарға деп жазылыпты. Ал егер қазақстандықтарға болса, онда оған шектеу қоюға мүлдем болмайды. Керісінше, қазақстандықтар шекаралық жерлерді барып игерсін. Көбірек игерсін.
Сонымен қатар ол шекарамыздың мыңдаған шақырым жерінде ешкім тұрмайтындығын, иен қалғандығы мәселесін атап өтті.
– Сол шекараны барып игеруіміз керек. Сол шекарада елді-мекендер құруымыз қажет. Сол жердегі жерді игеруге тиіспіз. Яғни, бұл мәселе бүгінгі отырыстың күн тәртібіне дұрыс қойылмаған. Ал шетелдікке жалға беру мәселесі бүгінгі күн тәртіпте жоқ. Ол туралы бүгін әңгіме болмайды, – деді Қуаныш Айтаханов.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе