Сейфуллин даңғылында тұратын алматылықтар нашақорлар мен жезөкшелерге қарсы

95 просмотров

Алматының Түрксіб ауданында Сейфуллин даңғылы бойының тұрғындары үй аулаларын нашақорлар мен жезөкшелерден босатуды талап етіп жатыр.

Бұл туралы КТК арнасы хабарлайды.

Адамдардың айтуынша, үй аулалары мен ойын алаңқайларында шприцтер үйіліп жатыр. Таяуда ойнап жүрген бала шприц инесін басып кеткен. «Мен жүгіріп келе жатып, аяғым қайырылып кетіп еді, оған ине қадалды. Мен оны абайлап, өзім  алып тастадым да, үйге жүгірдім», — дейді Ислам Шавкетов. Содан бері тыныштығы кеткен ата-ана баланың қажетті сараптамаларының бәрін тапсырып,  нәтижелерін күтіп отыр.

Аула аумақтарын тексеріп шыққан жергілікті тұрғындар жағаларын ұстады: шарбақтар мен талдардың түптері, гараждардың арты – барлық жерде шприцтер үйіліп жатты. «Олар балаларымыз ойнайтын алаңқайларға түн жамылып келіп, өз істерін жасап, арттарынан мүшеқаптар, майлықтарды қалдырып, шөлмектерін шағып, кетеді. Осының бәрін біздің балалар көріп жүр», — дейді ашынған жергілікті тұрғын.

Шенеуніктер мен құқық қорғаушыларға жазылған арыз хаттар нәтижесіз қалып отыр. Тұрғындардың айтуынша, полиция өткізетін рейдтер өте салысымен, жезөкшелер үйреншікті орындарына қайтып оралады.

Бұл аумақтың түнгі уақытта қадағалаусыз қалатындығын шенеуніктер мойындап отыр.

«Бұл тығырықтан шығудың бірден бір амалы – қоғаммен бірігіп жұмыс істеу: бұрынғы кеңес заманындағы жасақшылардан кезекші топтарын құрып, тәртіп бұзушыларды анықтап, олар туралы ақпаратты құқық қорғау органдарына беру қажет. Паспорттық деректер болмаса да, ондай адамдарды әшкерелеу үшін  бет әлпеттерін, ерекшеліктерін сипаттап беруге болар еді», — деп мәлімдеді Түрксіб ауданының көріктендіру бөлімінің жетекшісі Борис Жалғасбаев.

fce760d6-7083-4c17-85ef-60e51172de02

Загрузка...