Солтүстік Қазақстан облысында 24-шілдеде саңырауқұлақ теруге шығып, жоғалып кеткен 61 жастағы ер адамды іздестіру-құтқару жұмыстары жалғастырылып жатыр.
Бұл туралы СҚО Төтенше жағдайлар департаменті азаматтық қорғаныс басқармасының бастығы, майор Асқат Ержанов мәлім етті.
24-шілдеден бастап Солтүстік Қазақстан облысы департаментінің, сонымен қатар ведомстволық бағынышты мекемелер – өрт сөндіру және авариялық-құтқару жұмыстары қызметі, жедел-құтқару жасағы, Қызылжар ауданының жергілікті полициясы, Соколов орман шаруашылығының жеке құрамы мен техникасы, волонтёрлер мен жоғалған адамның туыстарынан құрылған күш саңырауқұлақ жинауға шығып, үйіне оралмай орманда жоғалған 61 жастағы петропавлдықты іздестіріп жатыр.
Топтар бір-бірімен үнемі радиобайланыс арқылы хабарласып отыр. Есіл өзені жағасына таяу орналасқан ормандар мен алқаптар тиянақты түрде қаралып, іздестіру операциясы басталғаннан бері 209 шаршы шақырым аумақ қаралды. Екі рет пилотсыз ұшу аппараты іске қосылып, іздестіру аумағын ұшып өтті.
«Күн сайын іздестіру операциясына 150-ге тарта адам қатысады, топтар арасындағы өзара іс-қимылдың жақсы деңгейін атап өткім келеді. Құтқару операциясының сәтті аяқталуына үміттенеміз»,- деді жағдай туралы айтқан штаб бастығының көмекшісі азаматтық қорғау майоры Болатжан Асқарбеков.