Бразилияның Рио-де-Жанейро қаласында өтіп жатқан Олимпиада ойындарында медаль алған мемлекеттер саны 27-ге жетті.
Бұл туралы Риодағы ҚазАқпарат тілшісі хабарлады.
Қазір Австралия 3 алтын, 2 күміс медальмен көш бастап келеді. Екінші орынға 2 алтын, 2 күміс, 3 қола медаль еншілеген Қытай құрамасы көтерілді. Ал үздік үштікті 2 алтын, 1 күміс, 1 қола медаль жеңіп алған оңтүстіккореялықтар түйіндеп тұр.
Әзірге, 14 мемлекет алтын алып үлгерді. Олар – Австралия – 3, Қытай – 2, оңтүстіккореялықтар – 2, Венгрия – 2, АҚШ – 1, Ресей спортшылары – 1, Жапония -1, Таиланд, Нидерланды, Вьетнам, қытайлық Тайбэй, Бельгия, Косово, Аргентина елдері де бір-бір алтыннан еншіледі.
Қазірге дейін 19 алтын, 19 күміс, 23 қола (60) медаль сарапқа салынды.