Ресей президенті Владимир Путин Елбасымен кездесуінде Анкарамен арақатынасты реттеуге жәрдемдескені үшін алғысын білдірді.
Владимир Путин кездесуде Нұрсұлтан Назарбаевқа Түркиямен қатынасты қалпына келтіруге ат салысқаны үшін алғыс айтты, деп хабарлады РБК.
– Сізге ресей-түрік қатынастарын қалпына келтіруде делдалдық миссия қабылдауға күш салғаныңыз үшін алғыс білдіргім келеді. Көріп отырғанымыздай, нәтижесі табысты, – деді Путин Сочидегі Елбасымен кездесу барысында.
«Түркия мен Ресейдің қатынастары реттеліп жатқанына қуаныштымын», – деді Нұрұслтан Назарбаев өз кезегінде. Мемлекет басшысының айтуынша, Ресей – «күрделі халықаралық проблемаларды шешуде» маңызды мемлекет.
Түркия Президентінің баспасөз хатшысы Ибрагим Калын бұдан бұрын Нұрсұлтан Назарбаевты Мәскеу мен Анкара қақтығысын шешуде құпия дипломатиямен айналысатын бірқатар «делдалдардың» ішінде бар екенін айтқан. Оның айтуынша, Қазақстан Президенті дағдарысты жағдайда Түркиямен «үлкен достықты» қолдаған.