Павлодар жылу электр орталығында апаттан зардап шеккен әйелдің халі мүшкіл

27 просмотров

Павлодардағы жылу электр орталығында болған ірі апат кезінде жұмысшы әйел буға күйіп, ауруханаға жеткізілген еді. Дәрігерлердің айтуынша, науқастың жағдайы өте ауыр. Ол жансақтау бөлімінде жатыр.

Оқиға оқшаулау жұмыстары жүргізіліп жатқан кезде орын алған деп хабарлады 24.kz. Оқыс жағдай күндізгі уақытта болды. Жылу агрегатының құбыры жарылып, одан ытқып шыққан ыстық бу жұмысшы әйелді шарпыған.

Қазіргі таңда науқас ауыр жағдайда Павлодар қалалық №1 ауруханасының жансақтау бөлімінде жатыр.

Марат Кенжеғалин, қалалық №1 ауруханасы күйік бөлімінің меңгерушісі:

— Науқас күйікпен бірге түрлі дене жарақаттарын алған. Оқиға кезінде сол аяғының балтыры зақымданып, сол жақ қабырғалары сынған. Жағдайы өте ауыр, ес-түзсіз жатыр.

Қазіргі таңда құзырлы мекеме өкілдері сотқа дейінгі тергеу амалдарын бастап кетті. Ал еңбек инспекторлары өндіріс орнында болған жағдайды анықтау үшін комиссия құрды.

Саят Асайынов, қала прокурорының орынбасары:

— Оқиға болған жер толық тексерілді. Қазір қылмыстық іс қозғалып, сотқа дейінгі тергеу амалдары басталды.

Айта кетейік, бұл үшінші жылу электр орталығындағы бірінші оқыс оқиға емес. Осыдан екі жыл бұрын дәл осындай жағдай орын алған болатын. Салдарынан бір жұмысшы көз жұмған еді. Сонымен қатар облыс орталығының тең жартысы электр қуатынсыз қалған.

Үшінші жылу электр станциясы «Павлодарэнерго» акционерлік қоғамының құрамына кіреді. Бұл қазандық 1978 жылы іске қосылған. Соңғы рет 5 жыл бұрын жөндеу жұмыстары жүргізілген. Бүгінде апатты қазандықтың жұмысы тоқтап тұр. Меруерт Әбдіхалық, «Павлодарэнерго» АҚ қоғаммен байланыс бөлімінің маманы: — Бұл дерек бойынша арнайы тергеу комиссиясы құрылды. Алдағы уақытта оқиғаның орын алу себептері анықталады. Жыл басынан бері Ертіс өңірінің өндіріс ошақтарында 112 оқыс оқиға тіркелген. Салдарынан 131 жұмысшы зардап шегіп, 20 адам оқиға орнында көз жұмды.

Загрузка...