Павлодарда бір апта бұрын сібір жарасына шалдыққан деп, облыстық жұқпалы аурулар ауруханасына жатқызылған үш адамның жағдайы жақсарып келеді.
Бұл туралы облыстық денсаулық сақтау басқармасының баспасөз қызметіне сілтеме жасап, pavlodarnews.kz хабарлайды.
Павлодар облыстық денсаулық сақтау басқармасының баспасөз хатшысы Махаббат Мұхамадиева бүгіндері сібір жарасын жұқтырды деген диагнозбен ауруханада жатқан үш адамның жағдайы жақсарғаны туралы айтты.
– 31 жастағы келіншек пен 30 жастағы азаматтың жағдайы жақсы. Жан сақтау бөлімінде жатқан 51 жастағы ер адамның да денсаулығы дұрысталып келеді. Ол өзі отырып, тамақтана алады. Бұдан басқа, Ертіс ауданының ауруханасында жатқан 24 адамның сегізі үйлеріне жіберілді. Олардың арасында төрт бала бар. Емдеу мекемесінде ауруды жұқтырған малдың етімен және сүтімен байланыс жасаған 16 адам жатыр, оның тоғызы бала, – дейді ол.
9 шілде күні ауылдағы 800 ірі қара мал, 1200 қой мен 100-ге тарта шошқаға қайта екпеден өтті. Сондай-ақ, сиыр сойылған жер мен сібір жарасын жұқтырып алған малдың иесінің ауласы толықтай өңделді. Медицина қызметкерлері үйлерді аралап, адамдардың тексеріп, дене қызуын қадағалауда. Айта кетерлігі, бұдан бұрын ауданда 14 күнге карантин енгізген болатын, ал бірнеше күн бұрын төтенше жағдай жарияланды.