Отбасына зорлық-зомбылық көрсетушілерге қатысты жаза күшейтілмек
Қазақстанда отбасындағы зорлық-зомбылық сипатындағы қылмыстардың 90 пайызға жуығы әйел адамдарға қатысты жасалады. Одан кейін егде адамдар мен балаларға көрсетілген зорлық-зомбылық әрекеттері орын алады.
Бұл туралы ҚР Бас прокуратурасында өткен зорлық-зомбылық профилактикасы бойынша ведомствоаралық кеңесте айтылды.
– Тұрмыстық зорлық-зомбылықтың профилактикасы саласындағы заңнаманы әрі қарай жетілдіру бойынша жұмыс жүргізу қажет. Заң барлық тұрғындарға түсінікті болуы және әр адам үшін қалыпты норма болуы үшін қызмет ету керек. Біз әйел адамдарға медициналық, құқықтық, психологиялық көмек көрсету жөнінде мемлекеттік кепілдіктерді қалай нығайтатынымыз туралы айту үшін жиналдық, – деді ҚР Мемлекеттік хатшысы Гүлшара Әбдіхалықова.
ҚР Бас прокуроры тұрмыстық зорлық-зомбылықтың ауыр әлеуметтік салдары бар проблема екенін атап өтті.
– Көшедегі агрессияның да бір себебі – отбасындағы жағдай. Үйден ызамен шыққан адам өшін өзгеден алады. Адамдардың қоғамдық жерлердегі және көліктегі теріс қылықтары, көп жағдайда, отбасында болып жатқан жағдайлардың көрінісі, – деді ол.
Статистика бойынша, Қазақстанда отбасындағы зорлық-зомбылық сипатындағы қылмыстардың 90 пайызға жуығы әйел адамдарға қатысты жасалады, егде адамдар мен балалар зорлық-зомбылық әрекеттерге тап болатын жағдайлар да аз емес. Біздің мақсатымыз тұрғындардың сана-сезімін өзгертудің жаңа жолдарын іздестіру, осы проблемаға деген көзқарасты өзгерту.
Осы орайда, Бас прокурор тұрмыстық зорлық-зомбылықтың алдын алу тетіктерін жетілдіруге бағытталған заңнамалық ұсыныстарды алға тартты. Мысалы, ұрып-соғу мен денсаулыққа жеңіл зиян келтіруді әкімшілік құқық бұзушылықтар қатарына қайтару, отбасылық жанжалшыларды ұстау мерзімін үштен 48 сағатқа дейін арттыру, қорғау нұсқамасының мерзімін 90 тәулікке дейін ұзарту ұсынылды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе