Қайғылы оқиға кісі аяғы баса бермейтін иен далада орын алған.
Бұл туралы “Алау” порталы хабарлады.
„Қайғылы оқиға биыл 6-маусымда Қостанай облысы Қарасу ауданында иен далада болған. Ер адам әйелін әдейі сол араға кездесуге шақырған. Сөйтіп ешкім естімейтін, кісі көрмейтін жерде ол әйелін сұрауға алып, көзіне шөп салмағанын анықтауға тырысқан.
Кездесу кезінде ерлі-зайыпты арасында жанжал шыққан. Қызғанышқа бой алдырған ер жанында жүрген ас үй пышағымен әйелінің ішіне тоғыз мәрте соққы жасаған. Қансыраған әйел оқиға орнында есін жимастан қайтыс болған”, – делінген облыстық мамандандырылған ауданаралық соты баспасөз қызметінің мәліметінде.
Сот айыпталушыны ҚР Қылмыстық кодексінің 99-бабы (“Адам өлтіру”) бойынша кінәлі деп тапқан. Ол 9 жылға бас бостандығынан айырылды, жазасын қатаң тәртіптегі колонияда өтейтін болады.