Жеңілдетілген тәртіппен азаматтық тіркете алмай, оралман мәртебесін жоғалтып алғандар қайтадан оралман мәртебесін қалпына келтіре алады.
Бұл туралы ҚР Ішкі істер министрлігінің Көші-қон департаменті хабарлады.
Қазақстан Республикасы азаматтығын алуға мүмкіндіктері болмай жүрген оралмандардың мәселесін ескере отырып, Денсаулық сақтау және әлеуметтік даму министрлігінің Еңбек, әлеуметтік қорғау және көші-қон комитеті оралман мәртебесін жоғалтып, жеңілдетілген тәртіппен Қазақстан азаматтығын ала алмай жүрген этникалық қазақтарға оралман мәртебесін қайта беру жөнінде шешім қабылдады.
Оралман мәртебесін растағаннан кейін этникалық қазақтар тіркеуде тұратын жерлері бойынша көші-қон полициясы бөлімшелеріне «Қазақстан Республикасының азаматтығы туралы» Заңның 16-1-бабына сәйкес, Қазақстанның азаматтығына жеңiлдетiлген (тiркеу) тәртiбiмен қабылдау туралы өтініш білдіре алады.
Өтінішті қарау мерзімі үш айды құрайды.
Сондай-ақ, оралман мәртебесін өткізіп алған этникалық қазақтарға оралман мәртебесін қайта алу кезінде төмендегіні ескеру қажет:
– оралман куәлігі емес, анықтама ретінде (мөрмен расталған, 3х4 фотосуреті бар) беруді;
– анықтама мерзімі 6 ай;
– анықтамада этникалық қазақтың міндеттемесін көздеу (яғни, анықтама берілген күннен бастап 6 ай ішінде Қазақстан Республикасының азаматтығын алуға облыстық ішкі істер департаменттерінің көші-қон полициясы басқармаларына тиісті құжаттарын тапсырып үлгеру);
– анықтама тек қана облыстық ішкі істер департаменттерінің көші-қон полициясы басқармаларына тапсыру үшін.