Оралдық бойжеткенді қағып өлтірген полиция қызметкері бостандықта жүр

69 просмотров

Оралдық бойжеткенді көлігімен қағып өлтіргені үшін сотталған полиция қызметкері Артур Серіковтің не себепті бостандықта жүргені белгілі болды.

Осы жайтқа қатысты ҚР Ішкіістер министрлігі қылмыстық жазаны атқару жүйесінің комитеті ресми түрде түсініктеме берді деп хабарлады BNews.kz.

«Биыл 28-сәуірдегі сот қаулысына сәйкес, Орал қалалық ішкі істер басқармасына қарасты Абай полиция бөлімінің бұрынғы қызметкері Артур Серіковтің жазасының қалған бөлігі пробациялық бақылау белгілеумен бас бостандығын шектеуге алмастырылды», — делінген хабарламада.

Комитеттің ақпаратынша, биылғы жылдың мамырынан бері ол Орал қаласының пробация қызметінде есепте тұр. Ол тұрғылықты жері бойынша әкімшілік-аумақтың шеңберінде емін-еркін жүріп-тұруға құқылы.

Сондай-ақ қылмыстық-атқару жүйесі сотталған полиция қызметкерінің көлік тізгінін қолға алғандығы туралы ақпаратты тексеріп шықты.

«Батыс Қазақстан облысы бойынша Қылмыстық жазаны атқару жүйесі департаменті аталған хабарды тексеріп шықты. Сотталушының көлік жүргізгені туралы дерек расталған жоқ», — делінген хабарламада.

Естеріңізге сала кетсек, марқұмның анасы қызын мерт қылған Артур Серіковтің көлік айдап бара жатқанын өз көзімен көргенін айтып, сот орындаушысына жүгінген еді.

Загрузка...