Оқушылар арасында «Ұшталған қалам» байқауы өтіп жатыр

162 просмотров

Ыбырай Алтынсариннің 175 жылдық мерейтойына арналған «Ұшталған қалам» қашықтықтан өткізілетін байқау басталып кетті.

ҚР Білім және ғылым министрлігі Ыбырай Алтынсарин атындағы Ұлттық білім академиясы жариялаған бұл байқау мектеп оқушылары, нақтырақ айтқанда, 7-11 сынып оқушылары арасында өткізіліп жатыр. Байқауға қатысушылар Алтынсарин туралы эссе жазып, оның мұраларын үлгі етіп, насихаттауы тиіс.

12-қазанда осы байқаудың аясында Астана қаласы №53 мектеп-лицейдің 5-сыныптары арасында «Ыбырай Алтынсариннің шығармалары — тәрбиенің алтын діңгегі„ атты жазушы әңгімелері желісінде ұйымдастырылған көріністер сайысы болып өтті деп хабарлады Астана қалалық білім басқармасының әдістемелік кабинеті.

Оның қорытындысы бойынша «Мақта қыз бен мысық» әңгімесін сахналаған 5 «Д» сыныбы І-орынға, «Әке мен бала» әңгімесінен көрініс көрсеткен 5 «А» сыныбы ІІ-орынды, «Асыл шөп» пен «Бақша ағаштары» көрінісі де сәтті шығып, оны сахналаған 5 «Е» және 5 «Г» сыныптары ІІІ-орын алды.

№53 мектеп-лицейдің директоры Қазбек Жәкенұлы жасөспірімдерді көркем әдебиетке баулитын мұндай іс-шараның маңыздылығын ерекше атап өтті.

Еске сала кетелік, Ыбырай Алтынсариннің 175 жылдық мерейтойына арналған «Ұшталған қалам» қашықтықтан өткізілетін байқаудың І кезеңі 26 қыркүйек пен 7-қазан аралығын, ІІ кезеңі 17 және 27-қазан аралығын қамтиды.

 

Загрузка...