Оңтүстікте бес жасар баланы ұрлағандар 7 жылға сотталды. Топ адамның алдын ала сөз байласу арқылы жасалған қылмысты іс Түлкібас аудандық сотында қаралды.
Бұл туралы otyrar.kz хабарлайды.
Тергеушілердің мәліметінше, сотталушы Қойшыбекова өзінің танысы Әділовамен сөз байласып, бала ұрлауды жоспарлайды. Кейін сот барысында айыпталушы азамат баласы жоқ болғандықтан, ұрлаған бүлдіршінді өзіне алып қалғысы келгенін айтады.
Еске салайық, бұл қылмыс 2016 жылдың көктемінде болған еді. 29 наурыз күні кешке Түлкібас аудандық ішкі істер бөліміне ауылдағы учаскелік инспектордан суыт хабар келіп түседі. Тәртіп сақшысы Састөбе аулында 5 жасар баланың жоғалып кеткенін мәлімдейді.
Оқиға орнына тез арада жеткен жедел-тергеу тобы сағат 17:30 шамасында 2011 жылы туған балақай ойын қуып, үйінен шығып, қайта оралмағанын анықтаған.
Жедел іздестіру іс-шараларын жалғастырған полицейлер санаулы сағаттардан соң жоғалған баланы көрші ауылдағы күдіктінің үйінен тапты. Бүлдіршінді алып кеткен 30 жастағы Түлкібас ауданының тұрғыны болып шықты.
Тәртіп сақшылары баланы дені сау, ешбір зақым келмеген күйде ата-анасына табыстады. Жоғалған баланың ата-анасы Түлкібас ауданының полицейлеріне кәсіби шеберліктері үшін алғыс айтты.