Оңтүстік Қазақстан облысында мектеп бітіруші түлек Аида Сапарбай өзіне қол салып, қайтыс болды.
Бұл туралы korrespondent.kz хабарлайды.
Қайғылы оқиға Оңтүстік Қазақстан облысы Сарыағаш ауданына қарасты Ошақты ауылында орын алған. №107 Сареми атындағы мектепте оқыған түлек сынақтан небәрі 53 балл жинаған (сегіз балды орыс тілі пәнінен жинаған) қыз он жеті жасқа толған күннің ертеңінде мал қорада асылып қалған.
Айта кетейік, бойжеткеннің күйзелісте жүргенін айналасындағылар да байқаған. Бұл тестілеу сынағына дейін орын алған. Осыдан кейін психологтар ҰБТ-ға қатыстырмай-ақ қойсақ қайтеді деген көрінеді. Білім бөліміндегілер психологтардың ұсынысын қабылдамай, ақыры сынаққа қатыстырыпты. Алайда бұл ақпаратты ауданның бас педагогы растамады.
Аиданың денесін 21 маусым күні, таңғы уақытта ағасы өз үйлерінің мал қорасынан тауып алған. Бұл іс Сарыағаш аудандық ішкі істер басқармасының 1-бөлімінде тіркелген. Қазір ҚР Қылмыстық кодексінің 105-бабы (өзін-өзі өлтіруге дейін жеткізу) бойынша сотқа дейінгі тергеу амалдары жүргізілуде. Қыздың денесінде ешқандай зорлық-зомбылық белгілері жоқ.