Оңтүстік Қазақстан облысында қатты дауыл салдарынан болған шығын толықтай өтеледі

40 просмотров

Оңтүстік Қазақстан облыстық коммуникациялар қызметінде өткен брифингте осы өңірдің төтенше жағдайлар департаментінің басшысы Александр Путейко мен облыстық энергетика және тұрғын үй-коммуналды шаруашылығы басқармасының басшысы Марғұлан Марайым күшті дауылдың салдарынан Отырар мен Түркістан аудандарына келтірілген шығын тез арада қалыпқа келтірілетінін мәлім етті.

ҚазАқпараттың хабарлауынша, күшті дауылдың салдарынан Отырар ауданына қарасты 7 ауылдық округтегі 650 үй мен 20 әлеуметтік нысан бүлініп, шамамен 75 миллион теңгенің шығыны келген.

Брифингте сөз алғандардың айтуынша, бүгінгі таңда ондағы 156 баспана кәсіпкерлер мен жергілікті тұрғындардың күшімен қайта қалпына келтірілген. Ал Түркістан қаласындағы Қарашық ауылында ауданы 500 шаршы метр 1 мектеп пен 963,93 шаршы метр «Ататүрік» атындағы білім ордасының шатыры ұшқан. Аталған білім ордаларына келген шығын — 12,2 млн теңге.

Түркістан қаласы мен Отырар ауданы әкімдерінің шешімі негізінде қос өңірде жергілікті маңыздағы төтенше жағдай жарияланды. Бұл тосын жағдайдан келген шығынды заң аясында төлеуге мүмкіндік береді.

Бүгінгі таңда үзілген электр желілері қайта жалғанып, электр қуаты толығымен берілді. Сондай-ақ, қос ауданда дауылдың салдарынан болған залалды жоюмен айналысатын арнайы топтар мен еріктілер тобы құрылды.

14 маусым күні түнде болған күшті желдің салдарынан Отырар ауданы мен Түркістан қаласында жүздеген нысанның шатыры ұшып, ғимараттарға зиян келген болатын. Қазір оқиға орнында арнайы комиссия жұмыс істеп жатыр. Табиғаттың тосын мінезінен орын алған төтенше жағдай облыс әкімінің жіті бақылауында екенін айта кетелік.

Загрузка...