Кеше түнде Францияның Ницца қаласындағы теракті кезінде Қазақстанның төрт азаматы оқиға орнына жақын маңда орналасқан қонақ үйде болған, олар зардап шеккен жоқ. Бұл туралы ҚР Сыртқы істер министрінің баспасөз хатшысы Әнуар Жайнақов мәлім етті.
Бұл туралы Ұлт порталы хабарлады.
«Ниццада болған терактіге байланысты, Франция халқына көңіл айтамыз. Алдын ала мәлімет бойынша, қаза тапқандар мен зардап шеккендер арасында қазақстандықтар жоқ. Дегенмен, теракті болған жерде Қазақстанның төрт азаматы жүрген.
Оның айтуынша, Ниццада жүрген төрт азамат ерлі-зайыптылар отбасы және олардың екі туысқаны. Төртеуі де бұл елге турист ретінде барған. Қазір олар өздері тоқтаған қонақүйде жатыр.
Айта кетейік, Ниццадағы терактіден қаза тапқандардың саны 84-ке жетті. 14 шілдеде кешкі уақытта жүк көлігі Бастилияны басып алу Күніне орай отшашуды көруге жағалауға жиналған адамдарды қағып кеткен еді.
Куәгерлердің айтуынша, жүк көлігі тоқтамастан, арлы-берлі жүріп, адамдарды екі шақырым бойында қағып жүрген. Жүк көлігінің жүргізушісі өлтірілді. Ниццадағы шабуылдан кейін арнайы операция жүрді. Оқиға орнынан ІІМ басшысы Бернар Казневтің барғаны айтылады. Франция президенті Франсуа Олланд шабуыл кезінде Авиньонда болған, бірақ ол дереу Парижге оралу туралы шешім қабылдапты.