Таңертең теледидарды қосамыз, өлді, қырылды, кешке қарай келеміз, тағы өлді, қырылды. Халық үрей, қорқынышқа бой алдырады да, артынан сан алуан діни ағымдардан қорған іздейді-мыс.
Бұл – белгілі саясаттанушы Нұрлан Ерімбетовтің пікірі. Астанадағы «Қазіргі кезеңдегі экстремизм мен терроризмнің алдын алу мен жолын кесудің заңнамалық және институционалдық шаралары» деген тақырыпта өткен дөңгелек үстелде «Азаматтық альянс» бірлестігінің басшысы Нұрлан Ерімбетов еліміздегі лаңкестік аxуалға қатысты өз ойын ортаға салып, аталған қауіп-қатердің негізгі себебін анықтап көрді.
– Бүгінде бір мәселені назардан тыс қалдырып отырмыз. Ол – бұқаралық ақпарат құралдарының жұмысы. Мен аймақтарға жиі шығып, адамдармен жүздесіп тұрамын. Қазір қай телеарнаны қоссаң да, қай порталға кірсең де, қай газетті оқысаң да, адам өлтірді, біреуді зорлап кетті, жоғарғы қабаттан секіріп кетті, жарылыс болды, педофил және тағы басқа ақпараттарды күні-түні беріп жатады. Осының салдарынан жастардың еліміздегі өмірге деген көзқарасы басқаша қалыптасады.
Таң атқаннан бастап өлтірді, зорлады, ұрлады… Менің прокурор достарым бар. Олардың айтуынша, осыдан 20-30 жыл бұрын болған жағдаймен салыстырғанда, қазіргі қылмыстық жағдай әлдеқайда жақсарды. Ал қазіргі ақпараттық жұмыс арзан рейтингті қуу, бұның бәрін заң жүзінде қолға алу қажет деп санаймын. Мен өзім кешке қарай теледидарды қоссам, бірден көңіл-күйім түсіп кетеді, – дейді Нұрлан Ерімбетов.
«Азаматтық альянс» басшысының айтуынша, бұл жайында аймақтардағы халық та жиі мәселе көтереді.
«Көңіліміз бұзылады дейді, таңертең теледидарды қосамыз, өлді, қырылды, кешке қарай келеміз, тағы өлді, қырылды. Халық үрей-қорқынышқа бой алдырады да, артынан сан алуан діни ағымдардан қорған іздейді», – дейді Нұрлан Ерімбетов.
Оның сөзіне қарағанда, бүгінде жастардың өмірін қалыптастыру мәселесіне баса көңіл бөлу керек. Терроризммен күрес жасақтарына миллиондап қаржы бөлгенше, жастардың уақытын ұтымды пайдалану жұмыстарына ақша шығарған жөн. Әйтпесе, бассейінге барудың өзі 1000 теңге тұрады.
Сондай-ақ Нұрлан Ерімбетов имамдар мен шіркеу қызметкерлеріне ғибадат орнында отырмай, xалықтың арасына жиі шығуға кеңес берді.