ҚР Білім және ғылым министрлігі мектеп психологтарының жалақысын көтеруді қарастырып жатыр.
Бұл туралы бүгін ҚР Үкіметі отырысының он-лайн трансляциясында еліміздің Білім және ғылым министрі Ерлан Сағадиев мәлім етті.
«Министрлік тарапынан атқарылып жатқан жұмыстарға қарамастан әлі де көптеген проблема бар. Қазіргі уақытта айлықтары аз болғандықтан психологтар мен әлеуметтік педагогтар мектептерде жиі ауысады. Мектептерді психологтармен қамтамасыз ету орта есеппен 98 пайызды, әлеуметтік педагогтар 80 пайызды құрайды. Жалпы психологтар бар, бірақ, олардың айлықтарының көлемін қарастыру керек. Осыған орай тиісті ұсыныстарды дайындап отырмыз, содан кейін енгізетін боламыз», – деді министр.
«Қалыптасқан проблеманы шешу үшін бір инспектор бірнеше мектепке бекітілген күннің өзінде, олар мектептерге барып жұмыстарын жасап, министрлікке қосымша есеп беруі қажет деп санаймыз. Біз мәселені ары қарай Ішкі істер министрлігімен бірге қарастыратын боламыз», – деді Сағадиев.