Ресей премьері Медведев Қазақстан Үкіметінің басшысы Мәсімовпен кездесуде Кейкі батырдың басын қайтару мәселесін қарастыратынын айтты.
Медведевпен кездесу барысында Мәсімов 1917 жылғы оқиғаларды тілге тиек етті.
“Біздің бір сауалымыз бар. Сол жылдардағы қазақтың ұлт-азаттық қозғалыс жетекшілерінің бірі Кейкі батырдың бассүйегі ұлы Петр атындағы Ресей ғылым академиясының Антропология және этнография мұражайында тұр. Сізден сұрарым, бәлкім тапсырма берерсіз, бәлкім осы мәселені шешуге атсалысарсыз. Бәлкім біз алмасармыз немесе оның бассүйегін Қазақстанға қайтарып, туған топырағына жерлеудің басқа да жолдарын тапсақ жөн болар еді. Қазақ үшін бұл өте маңызды мәселе” деді Мәсімов.
Кейкі батыр 1916 жыл Торғай көтерілісінің көрнекті көсемдерінің бірі. 1926 жылы Кейкі батырдың бассүйегі Санкт-Петербургтегі Кунсткамераға жеткізіледі.