Қостанай облысы Құсмұрын ауылының әкімі Жеңіс Ысқақов мас күйінде көлік айдағаны үшін 3 жылға жүргізуші куәлігінен айырылды.
Аудандық сот осындай шешім шығарған, деп хабарлайды BNews.kz.
Іс материалдарына сүйенсек, 29 наурыздан 30-на қараған түні Құсмұрын әкімі Жеңіс Ысқақов «Mercedec Benz» көлігімен ауыл ішінде жүйткіп жүрген. Шенеунікті тоқтатқан жол сақшылары әкімнің мас екенін аңғарған.
«Аталған фактіге қатысты ҚР Әкімшілік кодекстің 608-бабы, 1-тармағы бойынша әкімшілік хаттама толтырылды. Дәрігерлер жүргізушінің қанында алкоголь барын растады. Әулиекөл аудандық соты Ысқақовты үш жылға көлік айдау құқығынан айырды», – деді кеңесте талқыланған осы мәселеге қатысты мемлекеттік қызмет саласындағы бақылау басқармасының бас маманы Ербол Жайлебаев.
– Жетекші қызметтегі мемлекеттік қызметкер өзін бұлай ұстамауы тиіс. Осы қылығы үшін Құсмұрын әкімін қызметіне сай емес деп жариялауды сұраймын, – деді ол.
Бұл ұсынысты тәртіпке қатысты жиналған кеңестің барлық мүшесі қолдады.