Маңғыстау облысының экология департаментінің ғимаратындағы Қазақстан туының бүлінгенін Ақтау қалалық прокуратура қызметкерлері байқаған. Салынған айыппұл көлемі – 212 мың теңге.
Бұл туралы Техникалық реттеу және метрология комитетінің Маңғыстау облысындағы департаменті жетекшісінің міндетін атқарушы Тілектес Атшыбаев мәлім етті деп хабарлайды lada.kz.
– Ақтауда күн желді. Бұл оқиға қаңтар айында орын алған. Ол күні ауа-райы бұрқасын болған. Бірақ бұл жауапкершіліктен жалтаруға мүмкіндік бермейді. Барлық мекеменің басшысы мемлекеттік рәмізге құрметпен қарап, оның аяқ-асты етілуіне жол бермеуі тиіс.
Ақтау прокуратурасының мәліметінше, экология департаменті әкімшілік жауапкершілікке тартылып, 212 мың теңге көлемінде айыппұл салынды, – деді Тілектес Атшыбаев.
Сондай-ақ ол мемлекеттік рәміздерді пайдалану тәртібін бұзғандарға 2000 айлық есептік көрсеткішке дейін айыппұл қарастырылатынын ескертті.