Маңғыстау облысы Бейнеу ауданының №6 жол айырығында адамға қасқыр шапты.
Бұл оқыс оқиға 2 желтоқсан күні сағат 09:30-дар шамасында болған. Бейнеу аудандық орталық ауруханасы дәрігерлерінің айтуынша, қалың киім зардап шегушіні аман алып қалған, деп хабарлайды Lada басылымы.
Жәбірленушіні Бейнеу аудандық орталық ауруханаға жеткізген. Дәрігерлер ер кісінің аса ауыр жарақат алмағанын хабарлады. «Оны қалың киімі аман алып қалды, ешқандай дене мүшесіне тіс өтпеген, тек аяғы көгерген. Зардап шегушіге құтырмаға қарсы вакцина салынды. Осыдан кейін ер кісі қайта жұмысқа шықты. Шетпедегі ветеринарлық зертхана өлі қасқырда құтыру белгілері бар-жоқтығын анықтау үшін зертханалық сынама жүргізеді», – деп хабарлады Бейнеу аудандық орталық ауруханасы.
Куәгерлер өндіріс базасында кейде қарсақтардың жүретінін, бірақ қасқырдың көп жылдан бері бірінші рет келгенін тілге тиек етті.