Мәсімов сынға ұшыраған жанар-жағармай мәселесін шешуді екі министрге тапсырды

22 маусым 2016, 15:39

Қуандық Бишімбаев – ҚР Ұлттық экономика министрі. Қанат Бозымбаев – ҚР Энергетика министрі. Демек, осы екі министрге жанар-жағармай саудасындағы былық-шылықтарды анықтап, оны реттеу тапсырылып отыр.

Алдында еліміздің энергетика министрлігі АИ-90 жанар-жағармайының бағасын көтерулері ықтимал екендігін жарияланған. Алайда бұл ұсыныс қоғам тарапынан қатты наразылыққа ұшырады.

Халықаралық экономика сарапшысы Алғатбек Қыдырбек-ұлы министрліктің бағаны қымбаттатып, қазақстандықтарды АИ-80 емес, АИ-92 жанар-жағармайын алуға мәжбүрлейік деуі — барып тұрған бассыздық деп санаған. Оның айтуынша, шетелде АИ-80 маркасы мүлде өндірілмейді. Өйткені сапасыз нәрсені олар өндірмейді. Сондықтан олар бұл арада баға емес, негізінен, сапаға бастарын ауыртуы керек.