Қоғамның көтерген мәселесiн билiк қолдап, жүргізілген келiссөздер дұрыс шешiмге мүмкіндік берді. Бұл туралы «ҚазАқпарат» агенттігіне Жер реформасы бойынша комиссияның мүшесі, ондағы Ақпараттық түсіндіру жұмыс тобының жетекшісі Мұрат Әбенов осылай мәлім етті.
Естеріңізге сала кетейік, Мемлекет басшысы Нұрсұлтан Назарбаев елдің әлеуметтік-экономикалық даму қорытындылары және Жер реформасы бойынша комиссия қызметі туралы кеңес өткізді. Іс-шара барысында Жер реформасы жөніндегі комиссияның жұмыс қорытындылары талқыланып, жер заңнамасының өзгерістеріне мораторийді 5 жылға ұзарту туралы шешім қабылданды.
Оның пайымынша, мораторийді 5 жылға ұзарту – ол енді жерге қатысты барлық мәселелерді орнына қоюға мүмкіндік береді. Жалпы, жер комиссиясының төңірегінде біраз жақсы шешімдер болды. Бірінші кезекте комиссияның ашық әрі жария түрде болғаны осы саладағы көп кемшіліктерді ашты.
«Оның ішінде кейбір адамдардың қолдарына ауқымды жер аумақтары қалай тигенін қазір анықтауымыз керек. Екіншіден, жерді пайдалануда, бөлуде бір жерде ашық ақпараттың болмауы және оған есеп жүргізудегі кемшіліктер белгілі болды. Сонымен қатар салада сыбайлас жемқорлықтың бар екендігі анықталды. Осы ретте алдағы уақытта бұл мәселелерді шешу қажеттігін баршамыз байқап отырмыз. Менің жеке ойым, осы мәселелердің барлығын шешпей тұрып, әрине күрделі өзгерістер жасауға болмайды. Сол себептен 5 жыл уақыт қазір керек. Бүгінде жер кімнің қолында, егістіктерді қалайша пайдаланылып жатқандығы тұрғысында тиісті шаралар атқару керек. Егер заңсыздықтар орын алған жағдайда, қажетті шаралар қабылдау қажет болады», – деп тоқталды М. Әбенов.