Мұхтар Шаханов қырғыз президенті сөккен Арыстанбек Мұхамедиұлына араша түсті

146 просмотров

«Ресейде еден жуып күнелтіп жүрген қырғыздың жас қыздарына жаным ашиды» деп басы дауға қалған Мәдениет министрі Арыстанбек Мұхамедиұлына белгілі ақын Мұхтар Шаханов араша түсті. Оның айтуынша, қырғыздар қазақ министрінің сөзін бұрмалап әкеткен.

Қырғыз елінде 10 жыл қатарынан ҚР Төтенше және өкілетті елшісі болып қызмет атқарған, қазақ ақыны Мұхтар Шахановқа «skifnews.kz» тілшісі хабарласып, осы мәселеге қатысты сауал қойған.

– Қырғыздың үш басылымы маған да телефон соқты. Оларға мен: «Қазіргі материалдық байлық бірінші орынға шыққан күнкөріс заманында Мәскеуде де және басқа қалаларда да, сан түрлі қиын жағдайда жүрген қырғыздың да, қазақтың да, өзбектің де қыздары аз емес екендігін ұғындырдым. Министр Арыстанбектің қырғыз бауырларымыздың әлеуметтік жағдайына алаңдаушылық білдірген бір ауыз сөзін іліп әкетіп, гу-гулете теріс түсіндіріп жүргендерге тосқауыл болуымыз керек. Менің мынадай өлеңім бар:

Шындық кейде қалың арпа ішіндегі бір бидай,
Неге әділдік күресінде жұрттың көбі «Тымпибай?»
Рухсыздыққа кім шын мінез көрсетпесе қырғидай,
Ондайлардың бүгінгі аты «Ырбикүл» мен «Жырбибай!»

Сондықтан, Мәдениет министрінің бұрмаланған пікірін кейбір «Ырбикүлдер» мен «Жырбибайлардың» жел сөзінен қорғап қалу азаматтық міндетіміз емес пе? — дейді Мұхтар Шаханов.

Естеріңізге салайық, наурыз айында халыққа есеп берген Арыстанбек Мұхамедиұлы Ресейде еден жуып жүрген қырғыздың жас қыздарына жаны ашитынын айтқан болатын. Ал жуырда Қырғыз Республикасының президенті Алмасбек Атамбаев орта мектепті үздік бітірген түлектерге алтын сертификаттарын табыстау кезінде: «Ұры министр болғанша, еден жуушы болған дұрыс» деп салған.

Загрузка...