Ұлттық ұланның «Оңтүстік» өңірлік қолбасшылығы әскери бөлімдерінде Ақмола өңірінен Отан алдындағы борышын өтеу үшін шақырылған сарбаздар интернет-скайп жүйесі арқылы онлайн режимде ата-аналарымен, туған-туыстарымен видео-байланысқа шықты.
Бұл туралы „Оңтүстік„ өңірлік қолбасшылығының баспасөз қызметі хабарлады.
Ақмола облысы Көкшетау қаласындағы Ұлттық ұланның №5510 әскери бөліміне осы өңірден Отан алдындағы борышын өткеру үшін аттанған сарбаздардың ата-аналары, туған-туыстары көптеп жиналды. Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары генерал-майор Мұхаметқали Сатов жиналған қауымға Ұлттық ұлан тарихы, тыныс-тіршілігі мен сарбаздардың әскери өмірі туралы баяндап берді.
Осылайша жалғасқан іс-шара барысы келесі әскери бөлімдерге ауысты.
Айта кетейік, аталған іс-шара Қазақстан Қарулы Күштері бойынша Ұлттық ұлан әскерінде тұңғыш рет қолға алынып, 29 шілде күні Қостанай өңірінен шақырылған жас сарбаздар ата-аналары, туған-туыстарымен байланысқа шыққан болатын. Тәжірибеден сәтті өткен іс-шара бүгінде жалғасын тауып, алдағы уақытта да Қазақстан аумағының барлық өңірлерімен осындай байланыс орнату көзделуде.