«Лаңкестік» бабы бойынша сотталғандардың 98 пайызы өздерін салафиттер деп есептейді.
Бұл туралы «Аңсар» кеңес беру-оңалту орталығының директоры Асқар Сабдин «Ақтөбе» облыстық газетіне берген сұхбатында айтты.
– Салафизмге заңмен тыйым салынбады. Бұл — үлкен мәселе. Мен өзімнің мақалаларымда мұны лаңкестік оқиғасына дейін де жаздым. Лаңкестік бабы бойынша, елімізде 600-ден астам адам сотталды. Олардың 98 пайызы өздерін салафиттер деп есептейтіндер, яғни «3 негіз, 4 принцип», «Китабул Таухид» деген кітаптармен өскендер.
Қалғандары Хизбуттахрир, Таблиғи Жамағат және т.б. ұйымдардың өкілдері. Бұдан шығар қорытынды: азшылықты құрайтын ұйымдарға заңмен тыйым салынғанымен, көпшілігін құрайтындардың, яғни салафизм идеологиясын ұстанушыларға заңмен тыйым салынбай отыр. Сосын олардың іс-әрекеттері заңға қайшы болмай шығады.
Қазір интернетті ашып қарасаңыз, оларды насихаттаушы контенттер жетіп артылады. Мысалы, youtube сайтына кірсеңіз, ДАИШ-тың идеологтарының уағыздары ашықтан ашық тұр. Неге? Себебі, бұған заңдық тұрғыдан ешқандай тыйым жоқ. Әрине, Қазақстанда ДАИШ-қа тыйым салынған, бірақ оның идеологиясын құраушы салафизмге заң бойынша ешқандай тыйым жоқ, — дейді ол.
Сұхбаттың толық нұсқасын мына сілтеме арқылы оқи аласыздар.