Кәрім Мәсімов Алматыға келгелі жүр
ҚР Премьер-министрі Кәрім Мәсімов Үкіметтің отырысында Алматы қаласының әкімі Бауыржан Байбектің есебін тыңдай келе, қалаға арнайы баратынын айтты.
Қала басшысы 17-маусымдағы табиғаттың тосын мінез танытып, Алматыда су тасқынының болғаны баяндаған еді, деп хабарлайды BNews.kz.
– Бүгінде Алматыда қалаға қосылған аумақты қоса есептегенде, ұзындығы 221 шақырым болатын 28 өзен бар. Осыған байланысты біз су тасқыны болуы ықтимал 21 учаскені анықтадық. Ақпан-наурыз айларынан бері коммуналдық қызметтер ұзындығы 188 шақырым болатын өзен арналарын, каналдар мен арықтарды тазалап, 5000 текше метр қар, 17 мың текше метрден астам тұрмыстық қатты қоқыс шығарды, – деді Бауыржан Байбек.
Әкімнің айтуынша, табиғаттың мұндай тосын мінезі соңғы рет 1957 жылы байқалған көрінеді.
– 17-маусымда қала аумағында 94 су басу оқиғасы болды. 25 тұрғын үй мен 69 ауланы су басты. Су тасқыны салдарын жою үшін ТЖ департаменті базасында 110 адам, 28 бірлік техникадан тұратын штаб құрылды. Оның жұмысына азаматтық қорғаныс, аудандардың коммуналдық қызметтері тартылды. «109» қызметіне 332 қоңырау келіп түсіп, соның барлығы бойынша шара қабылданды. Сонымен қатар әлеуметтік желілер арқылы 100-ден астам өтініш түсті. Барлық мәселе шешілді. Кешке қарай су басқан негізгі орындарда су сорылып, таңертеңге дейін қала бойынша жұмыс аяқталды, – деді Бауыржан Байбек.
Қала әкімі жағдай бақылауда екенін мәлім етті. ҚР Премьер-министрі Кәрім Мәсімов оның есебін қабылдап, жақын күндері Алматыға баратынын жеткізді.
– Жақын күндері сіздерге бармақшымын. Қазіргі айтқандарыңызды көзбен көрсем деймін. Сіз екеуміз жаяу жүріп аралайтын боламыз. Қашан баратынымды кейінірек белгілеймін, – деді үкімет басшысы.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе