Көкшетау қаласында мектеп оқушылары асық ойнауды әдетке айналдырған. Қай мектепке барсаңыз да, үзіліс кезінде асық ойнап жатқан балаларды кездестіруге болады. Тіпті бұл үшін мектеп дәліздерінде арнайы орындар да қарастырылған екен, деп хабарлайды «31 арна».
Қоңырау соғылысымен, балалар дәлізде асық ойнауды әдетке айналдырған. Оның ішінде бес асық пен ханталапай ойнауға бәрінің жаны құмар.
Жұлдызай Амангелдиева, №3 орта мектеп оқушысы:
– Мен асық ойынын төрт жыл бойы ойнаймын.Осы ойыннан көптеген жетістіктерге жеттім. Негізі асық ойыны математика мен ой өрісін дамытады.
Бұнда ғана емес, тағы бір мектепте де осы жағдай. Үзілісте барсаңыз, асық ойынының нағыз қызған ортасына тап боласыз. Және оны ұлдар ғана емес, қыздар да ойнайды.
Мирас Сәдуақасов, №18 орта мектептің оқушысы:
– Біз асық ойнауды былтыр бастадық. Бізде қыздар да, ұлдар да түгел асық ойнайды. Асық бұл балаларды достастырады.
Балаларға асық ойыны мен оның түрлерін осыдан екі жыл бұрын еңбек пәнінің мұғалімі үйреткен екен. Содан бері қызығушылықтары артқан оқушылар жаппай асық ойнауға көшкен. Көбіне бастауыштан 7 сынып аралығындағы оқушылар осы ойынға әуес.
Өміртай Өкейұлы, Еңбек пәнінің мұғалімі:
– Өздері ойнайды. Сен ойна деп айтпаймыз. Үзіліс кезінде, бос уақытында барлығы осында келіп ойнайды.
Еңбек пәнінің мұғалімі балалардың қызығушылығын ескеріп жиналмалы үстел де жасап берген. Еденге арнайы кілем де төселген. Басқа да мектептерде асық ойынына қатысты үйірмелер ашылып, қала оқушылары арасында кең таралып жатыр.