Ішкі істер министрлігі департаментінің бұрынғы басшысы сот залында қамауға алынды

122 просмотров

Бүгін Астанадағы №2 Алматы аудандық сотында ҚР ІІМ жедел-криминалистикалық департаментінің бұрынғы басшысы Қайрат Аманқұловқа қатысты қылмыстық іс қаралды.

Осыған дейін ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің қызметкерлері Қайрат Аманқұловтың 136 миллион теңгені жымқырды деген күдікке ілінгенін хабарлаған болатын. Ал бүгін судья Айбек Әмірғалиев сот үкімін шығарды, — деп хабарлайды Tengrinews.kz.

«Қайрат Аманқұлов ҚР Қылмыстық кодексінің 307-бабының 4-бөлігі бойынша айыпты деп танылсын. Жазасын жалпыға бірдей тәртіп режиміндегі колонияда өтей отырып, 6 жылға дейін бас бостандығынан айырылсын. 7 жылға дейін мемлекеттік және мемлекеттік билік пен басқару органдарында қызмет ету құқығынан айырылсын. Жеке меншігіндегі мүлкі тәркіленсін. (…) Аманқұловқа қатысты бұлтартпау шарасын қамауда ұстаудан қамауға алуға өзгертілсін», — деп шешім шығарды судья.

Істің басқа фигуранттары — Жүсіп Мұсалдин мен Киікбай Тәжмағамбетов те айыпты деп танылды. Сот олардың 4 жылға дейін бас бостандығынан айыру туралы шешім шығарды. Сондай-ақ, олардың мүлкі тәркіленіп, жазаны жалпыға ортақ колонияда өтеуіне қатысты үкім шығарды. Соттың шешімімен екі азамат 7 жылға дейін мемлекеттік қызметте жұмыс істеу құқығынан айырылды. Олар да сот залында қамауға алынды.

Сотталушылардың және олардың адвокаттарына қарағанда олар соттың мұндай үкімді шығаратынын мүлде күтпеген.

Айта кетейік, 2015 жылдың қараша айында Қайрат Аманқұловқа қатысты үй қамауына алу туралы бұлтартпау шарасы қолданылған болатын. Аманқұловпен қоса сот алдына оның бұрынғы орынбасары мен ведомствоның қызметкері келді.

56 жастағы Қайрат Аманқұлов ҚР Ішкі істер министрлігі жедел-криминалистикалық департаментінің басшысы қызметіне 2011 жылдың шілдесінде келген еді.

Загрузка...