Иманғали Тасмағамбетов ЕХРО-2017 көрмесіне дайындық бойынша кеңес өткізді

Кеңес жұмысына Астана қаласының әкімі Әсет Исекешев, ҚР Мәдениет және спорт министрі Арыстанбек Мухамедиұлы және «Астана ЭКСПО-2017» ҰК» АҚ басқарма төрағасының бірінші орынбасары Марат Омаров қатысты.

Астанада өтетін көрменің маңыздылығын айта келе, Иманғали Тасмағамбетов ЭКСПО-2017 көрмесін ұйымдастыру және өткізу тәуелсіз Қазақстанның барлық жетістіктерін және елорданың келбетін паш етуі тиіс екендігін баса айтты. Осыған орай, шараны өткізуге және қонақтарды қабылдауға елорда инфрақұрылымының дайындығын қамтамасыз ету, сондай-ақ, көрме қонақтары мен қатысушыларының қауіпсіздігі, олардың қызықты әрі барынша жайлы орналасуы үшін бүкіл шаралар қабылдануы қажет.

«Мемлекет басшысының тапсырмасын сапалы орындау мақсатында Мәдениет және спорт министрлігіне Астана қаласының әкімдігімен және «Астана ЭКСПО-2017» ҰК» АҚ бірлесіп көрме өтетін кезеңдегі мәдени бағдарламаны ұйымдастыру мәселелері жөніндегі үйлесімді жұмысты күшейту қажет. Сонымен қатар, делегаттар мен қонақтардың келуі бойынша ұйымдастырушылық талаптарын орындау маңызды», – дейді Иманғали Тасмағамбетов.

Еске сала кетейік, бүгінгі таңда ҚР Мәдениет және спорт министрлігі Астана қаласының әкімдігімен, «Астана ЭКСПО-2017» ҰК» АҚ бірлесіп, арнайы кешенді бағдарлама әзірледі. Оның аясында әртүрлі жанрлық бағыттағы мәдени іс-шаралар өтеді. Нақтырақ айтқанда, қазақтың дәстүрлі өнерін көрсету, театрлық-бұқаралық шаралар, халықаралық жобалар, көрмелер, спорттық және ағартушылық-тақырыптық шаралар.

Вице-премьердің айтуынша, қалалық құрылымдар алдында жоғары деңгейде қызмет көрсету мәселесі тұр. Ұйымдастыру жұмысы аясында ЭКСПО көрмесі нысандарының, жалпы Астана қаласындағы көлік инфрақұрылымының қалыпты қызметі мәселесі байыппен шешуді қажет етеді. Көлік-логистикалық жүйені жетілдіру, қоғамдық көліктің бағдарлық желісін оңтайландыру, көлік ағынын басқарудың жаңа жүйесін енгізу жұмысына ерекше көңіл бөлінуі қажет.

Бұл орайда, кеңес барысында вице-премьер бірқатар тапсырма берді. Астана қаласының әкіміне жұмыс штабымен бірлесіп елорданың инженерлік-көліктік инфрақұрылымын егжей-тегжейлі зерделеу тапсырылды. Дәлірек айтқанда, жолдағы жүктемені азайту мақсатында көлік ағынын модельдеу бойынша қолайлы нұсқаларды есептеу, қонақтардың келу және олардың қауіпсіз орналасуы бойынша ұйымдастырушылық сұрақтарды пысықтау, сондай-ақ, мәдени-бұқаралық іс-шаралардың жоғары деңгейде өтуін қамтамасыз ету.

Осындай ауқымды шараны өткізу шағын және орта бизнестің дамуына және жаңа технологияларды меңгеруге айрықша серпін беретіні анық. Көрме елорданың инфрақұрылымы мен нысандарының құрылысына жеке инвестиция тартуға ықпал етеді. ЭКСПО-2017 – ұзақ мерзімді әлеуметтік-экономикалық дамуға оң әсер ететін еліміздің туристік тартымдылығын көтеруге бағытталған имидждік жоба.