Ертең сағат 11:00-де Алматы облысындағы «Байсерке-Агро» ЖШС базасында Жер реформасы жөніндегі комиссия мүшелерінің облыс халқымен кездесуі өтеді.
Кездесу барысында ҚР Ауыл шаруашылығы вице-министрі Ерлан Нысанбаев, Алматы облысы әкімінің орынбасары Серікжан Бескемпіров ауыл шаруашылығы жерлерінің пайдаланылуы туралы баяндама жасап, Қазақстан Республикасы Жер кодексінің нормалары талқыланады деп жоспарланып отыр.
Естеріңізге сала кетейік, бұған дейін комиссияның алғашқы көшпелі отырысы Ақмола облысының орталығы Көкшетау қаласында өтті. Отырыс 4 сағатқа созылды.
Онда өңір әкімі Сергей Кулагин өңірдегі 300 мың гектар жер қытайларға жалға беріледі деген ақпараттың жалған екенін айтты. Сондай-ақ жиын барысында әкім меншігінде қанша гектар жер бар екені де мәлім болды.