Ердоған Түркиядағы мыңнан астам мектепті жабуды талап етті
Түркия президенті Режеп Ердоған шілденің 21-інен бастап енгізілген төтенше жағдай аясында елдегі мыңнан астам жеке меншік мектепті жабуды талап еткен.
Бұл туралы Азаттық хабарлайды.
Мектептерден бөлек мыңнан астам қор, отыздай денсаулық сақтау мекемесі және 15 жоғары оқу орны да жұмыстарын тоқтатады. Жабылған мекемелердің барлығы қазір АҚШ-та тұрып жатқан оппозициялық діни қайраткер Фетхулла Гүленмен байланысы бар деген күдікке ілінгендер.
Бұл елде әскери төңкеріс жасауға әрекет сәтсіздікке ұшыраған соң төтенше жағдай енгізілгелі бері Түркия президентінің алғашқы жарлығы. Бүлікке қатысы бар деген күдікпен он мыңнан астам адам ұсталған. Күдікке ілінгендерді мемлекеттік қызметтен жаппай босатып жатқаны туралы хабарлар тарады.
Түркия билігі 16 шілдеде мемлекеттік төңкеріс жасамақ болған деп Фетхулла Гүленді айыптайды. Гүлен Түркиядағы әскери төңкеріс жасау әрекетін айыптап, өзіне Анкараның таққан айыбын үзілді-кесілді жоққа шығарған.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе