Ердоған үш айға төтенше жағдай жариялады

40 просмотров

Түркия президенті Режеп Ердоған елде үш айға төтенше жағдай енгізілгенін жариялады. Ұлттық қауіпсіздік кеңесінің 20 шілдеде Анкарада өткен жиналысындағы Ердоғанның мәлімдемесі тікелей эфирде көрсетілді. Осындай шешім қабылдауға 15 шілдедегі сәтсіз әскери төңкеріс түрткі болды.

Бұған дейін Ердоған, Al Jazeera телеарнасына берген сұхбатында, төңкерісті ұйымдастыруға шет мемлекеттер қатысуы мүмкін деп мәлімдеді, бірақ ешқандай елді атаған жоқ. Түркия үкіметі әскери төңкерісті қазір АҚШ-та тұратын оппозиция жетекшісі, исламды насихаттаушы Фетхуллах Гюлен ұйымдастырды деп есептейді.

Ердоған түрік демократиясына қауіп төнді, елде авторитарлық билік орнады деген тұжырымдармен келіспейтінін мәлімдеді. «Біз демократиялық парламенттік жүйеден ешқашан бас тартпаймыз», — деді ол.

Бұған қоса түрік президенті, елдің Еуропалық Одаққа кіруіне кедергі болуы мүмкін екендігіне қарамастан, парламенттің өлім жазасын қайтару туралы шешімін мақұлдайтынын жасырмады.

Бірқатар мемлекеттердің сыртқы істер министрлері Вашингтондағы жиында түрік билігінің сәтсіз мемлекеттік төңкерістен кейін елде қудалауды күшейтіп жібергеніне алаңдаушылық білдіріп, Түркияны заң үстемдігін сақтауға шақырды.

Загрузка...