Елбасы Назарбаев университеті түлектерінің оқу бітіру салтанатында Ақтөбедегі оқиғаны даттады

26 просмотров

5 маусым күнгі Ақтөбедегі лаңкестік актіні елімізді жанжалдар құрдымына айналдырғысы келгендер жасады. Бұл туралы бүгін Назарбаев Университеті түлектерінің екінші салтанатты оқу бітіру рәсімінде сөз сөйлеген Елбасы Нұрсұлтан Назарбаев айтты деп хабарлайды ҚазАқпарат.

— Бұл — өз халқыңа қарсы жасалған қылмыс. Лаңкестік актіні біздің елімізді жанжалдар құрдымы мен лаңкестіктік бүлікшілігіне айналдырғысы келгендер жасады. Жас полиция қызметкерлерінің, әскерилердің ерлігі — біздің барлық жастар үшін үлгі. Олар лаңкестерді тоқтатып, еліміздегі бейбітшілік пен тыныштықты қалпына келтірді. Әр уақытта да осылай болады.

Біз өзіміздің реформаларымызды жалғастыра береміз, ел дамуының барлық стратегияларын орындаймыз. Бейбітшілік пен тыныштық, қауіпсіздік — Қазақстан тәуелсіздігінің құндылықтары. Егер бұл болмаса, ұлттың болашағы да болмайды. Сіздер мұны есте сақтауларыңыз қажет, — деді Елбасы.

Мемлекет басшысы жыл сайын әлемде әскери жанжалдардың, әлеуметтік негізден туындайтын этносаралық, конфессияаралық қақтығыстардың 30-дан астам ошағы тіркелетіндігін атап өтті. Дәл осындай елдерде мемлекеттің күйреуіне, адамдардың босқынға айналуына түрткі болатын лаңкестік, экстремизм үшін жағдай пайда болатынын айтты.

«Біз болашаққа зор жоспарлар түзіп отырмыз. Ол үшін тұрақты ел мен мемлекет қажет. Бұл барлық қазақстандықтарға, әсіресе сіздерге, жастарға да байланысты», — деді Нұрсұлтан Назарбаев.

Загрузка...