Бүгін Мемлекет басшысы Нұрсұлтан Назарбаев индустрияландыру жұмыстарының бірінші жартыжылдықтағы қорытындысына арналған телекөпір кезінде 11 жаңа зауытты іске қосты.
Бұл туралы BNews.kz хабарлайды.
– Өздеріңіз білесіздер, осыдан алты жыл бұрын индустриялдық-инновациялық даму бағдарламасының алғашқы кезеңін бастадық. Осы жылдар біз үшін өте табысты болды. Өңдеуші өнеркәсіп саласында 1000-нан аса кәсіпорын іске қосылды.
Қазақстандықтар үшін мүлдем беймәлім болған жаңа 500 өндіріс өз жұмысын бастады. Елімізде 200 мыңнан астам жұмыс орны ашылды. Ерекше айта кететін жайт, өңдеуші өнеркәсіп дамыды, – дейді Мемлекет басшысы.
Президенттің айтуынша, Кеңес одағы кезінде Қазақстан шикізат жеткізушінің рөлін ғана атқарып келді. Машина мен құрылыс саласы және өңдеуші сала дамытылмады.
– Біздің қазіргі жұмысымызды үлкен төңкеріс деп бағалауға болады. Индустрияландыру деген осыдан басталады. Өңдеуші өнеркәсіпті индустрияландыру неге сонша қиын болды? Себебі, оның негізі жоқ еді. Өсу қарқыны бойынша өңдеуші өнеркәсіп тау-кен өнеркәсібі саласын басып озып отыр.
Біз үшін ең қиынға соққаны өңдеуші өнеркәсіп саласын индустрияландырып, жаңа өндірістер ашу болды. Ешетеңе де оңайлықпен келмейді. Бүгінгі қосылып жатқан зауыттар төккен тердің жемісі, – деп түйіндеді өз сөзін Нұрсұлтан Назарбаев.