Еліміздің белгілі азаматтары Моңғолияда су тасқынынан зардап шеккен қандастарымызға қаржылай көмек беріп жатыр. Бұл туралы әлеуметтік желілерде жазылады.
Асыл арнаның бас директоры Мұхамеджан Тазабек Фейсбуктегі жеке парақшасында:
«Қабырғаммен кеңесіп, отбасыммен ақылдаса келе, биыл жазғы демалысымдағы Алакөлге барамыз деген қаржыны Моңғолиядағы бауырларға жіберсек деген шешімге келдім. Ағайындар суға кетіп жатқанда суға түсіп раxаттануды кейінге қалдыру өзіме де, бала-шағама да дұрыс қадам болып көрінуде. Алла қабыл етсін. Мақтану үшін емес, жұрттың қайырымдылығына сеп болу үшін жасалып жатқан шаруа ғой» деп жазды.
«Көп уақыт алмайды. Небары 3-4 минут алтын уақыттарыңызды қисаңыздар жетіп жатыр. Халық банкінің кез-келген банкоматы арқылы көрсетілген есеп-шотқа ақша аударуға болады», – дейді ол.
Моңғолияның қазақтар тұратын Баян-Өлгий аймағында өткен жексенбі күні су тасқыны салдарынан 130 үй қирап, 700 қандасымыз баспанасыз қалды. Соған байланысты еліміздегі белсенді азаматтар, атап айтқанда, «Қазбілім» орталығының директоры Аятжан Ахметжан қандастарға жәрдем ретінде банктен есеп-шот ашты. Ал үкімет басшысы Кәрім Мәсімов Баян-Өлгийде зардап шекккендерге гуманитарлық көмек көрсетілетінін хабарлады.