Әнші Ділнәз Ахмадиева қазақ тілін оқытатын курсқа барып жүр. Бұл туралы «Қазақстан» ұлттық телеарнасының «Түнгі студияда Нұрлан Қоянбаев» бағдарламасына қонақта болған әншінің өзі айтқан.
Бағдарлама қонағы бүгінгі қолға алған істерінен тыс өткендегілерін де еске алып, өнер жолында тап келген кейбір қызық оқиғаларынан да сыр шертті.
«Қызықты оқиға талай болған. Үш рет тура сахнаға шығар кезімде аяқ киімім жоғалып, тығырыққа тірелгенім бар. Бірақ, амалын тауып, сахнада өнер көрсеттім. Әсіресе, Республика сарайында өткен кештердің бірінде құрбымның 38-мөлшердегі аяқ киімін киіп шыққаным есімнен кетпейді. Құрысын, сахнаға шыққанымды қайтейін, қозғала алмай, ән орындадым ғой» дейді өткенін бір күліп еске алған әнші.