Бүгін Парламент Мәжілісінің жалпы отырысында депутат Айқын Қоңыров мектептің әскери дайындық пәніне арнайы киім талап етуге тыйым салу туралы мәселе көтерді. Осыған байланысты депутат Білім және ғылым министрі мен Қорғаныс министрінің атына сауал жолдады.
Бұл туралы ҚазАқпарат хабарлады.
– Мектеп формасы Білім және ғылым министрінің 2016 жылғы 14 қаңтардағы «Орта білім берудегі киім үлгісіне қойылатын міндетті талаптарды бекіту» туралы бұйрығымен регламенттеледі. Онда мектеп формасы күнделікті киім үлгісі, мерекелік және спорттық киім үлгісі болып бөлінген.
Ал жалпы орта білім беретін мектептердегі алғашқы әскери дайындық пәніне 10-11 сынып оқушылары жинақы киім киіп келуі міндеттеледі. Дегенмен, ережеге сәйкес осы пән оқытушысы сабақ басталмас бұрын оқу топтарына немесе взводқа қандай киім киетіндері туралы хабарлауы керек. Яғни, оқытушы оқушылардың қандай киіммен келетінін өзі айқындайды, – деді депутат Айқын Қоңыров.
Оның айтуынша, соңғы уақытта ата-аналар 10-11 сынып пен колледж оқушылары алғашқы әскери дайындық пәніне арнайы киім талап етілетінін айтып шығамданған. Ал бұндай арнайы киімдер жиынын сатып алу 20-30 мың теңгеден асады.
– Бұл отбасылық бюджет үшін айтарлықтай салмақ. Оның үстіне ата-аналар қыстың күні әскери оқуға қатысты қыстық киім үлгілері де талап етіле ме деп алаңдайды. Оның бағасы жоғарыда айтылғаннан 2-3 есеге қымбат шығады. Осыған байланысты орта мектептерде алғашқы әскери дайындық сабағына арнайы киім үлгісін талап етуге тыйым салу керек деп санаймыз.
Оқушылардың бұл сабаққа күнделікті немесе спорттық киім үлгісін киіп қатысуларына еркіндік берілуі тиіс. Олай болмаған жағдайда бұл киім үлгісін алуды Қорғаныс министрлігінен арнайы қаражат бөлу арқылы қамтамасыз ету қажет деп санаймыз, – деді Айқын Қоңыров.