Бұл туралы Астанада өткен «Қазақстандағы медицина – емдеймiз бе, табыс табамыз ба?» атты дөңгелек үстел барысында Мәжiлiс депутаты Жамбыл Ахметбеков мәлімдеді.
Оның пікірінше, биыл Қазақстанның денсаулық сақтау саласындағы қызмет көрсету құны 2015 жылмен салыстырғанда 20 пайызға өскен, деп хабарлайды BNews.kz.
– Әсiресе, Алматы мен Қостанайда баға қатты шарықтаған. Дәл осындай көрсеткiш фармацевтика өнiмдерi саласында да байқалды, дәрiханалардағы дәрi-дәрмек бағасы көтерiлiп кеткен. 2016 жылдың I-тоқсанында 2015 жылдың сәйкес кезеңiмен салыстырғанда бiр дана дәрiнiң құны ұлттық валютада 42,1 пайызға немесе 533,5 теңгеге өстi, – дейді ол.
«Денсаулық сақтау – саласы елiмiзде қордаланған әлеуметтiк мәселелердiң iшiндегi ең өзектiсi. ҚР Парламентiнiң Мәжiлiсiне «ҚР кейбiр заңнамалық актiлерiне мiндеттi әлеуметтiк медициналық сақтандыру мәселелерi бойынша өзгерiстер мен толықтырулар енгiзу туралы» заң жобасы келiп түстi. Жобамен таныса келе, түйгенiмiз, жаңа жүйенi елiмiзде енгiзу бiрнеше кезеңдi қамтығалы отыр. Өткен жылы мiндеттi әлеуметтiк медициналық сақтандыру туралы заң қабылданды. Ендi осы заңды қолданыстағы басқа заңдармен сәйкестендiру үшiн бiрқатар заңға өзгерiстер енгiзу көзделiп отыр», – дейдi Жамбыл Ахметбеков.
Оның айтуынша, осы өзгерiстер арқылы медицинадағы проблемалар шешiмiн табуы тиiс. Қарапайым халық та өз ұсыныстарын жеткiзсе, жүйе одан да зор пайда әкеледi.