Денсаулық сақтау министрлігі халықты әлеуметтік желіде екпеден бас тарту туралы дәрігер уағызына сенбеуге шақырып, оның жалған екенін мәлімдеді.
Бұл туралы министрліктің ресми сайтында хабарланды.
„Интернетте таратылған ақпарат шындыққа еш жанаспайды. Өзін Қазақстанның Денсаулық сақтау және әлеуметтік даму министрлігінің бас гомеопат-дәрігері болып таныстырған Марина Таргакова деген адам біздің министрлікте жұмыс істемейді. Бізде ондай адам жоқ.
ҚР Денсаулық сақтау және әлеуметтік даму министрінің штаттан тыс бас мамандарының тізімін бекіту туралы бұйрығында гомеопат-дәрігер дегеннің өзі де жоқ. Сондықтан ҚР Денсаулық сақтау министрлігі Қазақстан азаматтарын мұндай мәлімдемелерге назар аудармауға шақырады„ делінеді министрліктің бұл жайтқа қатысты түсініктемесінде.
Бүгінгі күні халықты иммунизациялау вакцинамен басқарылатын жұқпалы аурулардың алдын алудың негізгі әдісі болып табылады. ҚР Ұлттық екпе күнтізбесіне сәйкес, Қазақстанда 21 жұқпалы ауруға қарсы тегін вакцинациялау жүргізіледі. Вакцинациялаудан бас тарту инфекцияны қабылдағыш адамдардың және аурудың көбеюіне алып келеді.